Тыва Республиканың девискээринге 2024 чылдың март 15, 16, 17 хүннеринде эрткен Россия Федерациязының Президентизиниң соңгулдаларының түңнелдери

2024  чылдың март 18-те Тыва Республиканың Соңгулда комиссиязы Россия Федерациязының Президентизиниң үш хүн дургузунда эрткен соңгулдаларының түңнелдерин үндүрген.

Бадылаашкын март 15-тен 17-ге чедир үш хүн уламчылаанын сагындыраал. Соңгукчулар бодунуң үнүн: соңгулда участогунга, бажыңынга, а ол ышкаш  “Мобилдиг соңгукчу” деп капсырылга аайы-биле түр када чурттап турар черинге - 3 аңгы арга-биле соңгуур аргалыг болган.

Бадылаашкынга соңгукчуларның 95,52 %, азы 189687 кижи киришкен.  Оларның иштинден 9548 – кижи хуусаа  бетинде, 152099 кижи – соңгулда участоктарынга, соңгулда участоктарындан дашкаар – 28040 кижи бадылаан.

Кордакчыларның аразындан кончуг улуг ылгал-биле удурланыкчыларын мурнап, Күрүнениң баштыңы Владимир Путин – 95,37 % (180 902 үн) бирги черже үнген, бо көргүзүглер 2018 чылда эрткен Президент соңгулдаларында көргүзүглерден улуг, ынчан ону Тываның соңгукчуларының 91,98 % деткээн.

            Өске кордакчыларның алган үннери мынчаар хувааттынган:

Николай Харитонов (РФКП) – 2,10 % (3 990 үн);

Леонид Слуцкий (РЛДП) – 1,14 % (2167 үн);

Владислав Даванков («Чаа кижилер” партия) – 1,07 % (2039 үн).

Россияның Президентизиниң соңгулдаларынга республиканың чурттакчы чонунуң политиктиг идепкейлиг чоруун демдеглээри чугула: шупту 19 муниципалдыг тургузуглар аайы-биле киржилге 90 хуудан улуг, Кызыл хоорайга  – 92,31 % болган.

Соңгулдаларга эң хөй кижи киржилгелиг 99 хуу киржилгелиг үш кожуун: Сут-Хөл - 99,55%, Эрзин - 99,49%, Тес-Хем - 99,35% кирип, эки үре-түңнелдиг ажылын көргүскен.

Муракчыларның аразында: Бай-Тайга - 98,93%, Чаа-Хөл - 98,74%, Мөңгүн-Тайга - 98,58% болган.

5 кожуунда – 5 сумуда соңгукчулар ниитизи-биле 100 %  Владимир Путин дээш бадылаан. Ол дээрге:

- Чөөн-Хемчик кожуунда Чыраа-Бажы;

- Каа-Хем кожуунда Кундустуг;

- Бии-Хем кожуунда Хүт;

- Улуг-Хем кожуунда Иштии-Хем;

- Сүт-Хөл кожуунда Ак-Даш.

Шупту муниципалдыг тургузугларда, а ол ышкаш Кызыл хоорайда соңгукчуларның 90%  хөйү Владимир Путин ДЭЭШ соңгаан.

Владимир Путин дээш 6 кожууннуң: Сүт-Хөл - 99,15%, Мөңгүн-Тайга - 98,87%, Эрзин - 98,63%, Бай-Тайга - 98,23%, Чөөн-Хемчик - 97,87%, Тес-Хем - 97,75% кожууннуң чурттакчылары хөй үннү берген.