Тыва Республиканың девискээринге 2024 март 15, 16, 17-де эрткен Россия Федерациязының Президентизиниң соңгулдарының баш бурунгаар түңнелдери

Тыва Республикага март 15, 16, 17 хүннеринде Россия Федерациязының Президентизиниң соңгулдаларының бадылаашкыны 187 соңгулда участогунга эрткен.

Ажык-чарлыг болурун хандырары-биле Хөй-ниити хайгааракчыларының төвү болгаш бүрүткеткен 570 хайгааракчының хайгааралы-биле соңгулда ажыл-чорудулгазы эрткен.  УИК бүрүзүнге-ле ортумаа-биле 3 хайгааракчы онаажып турган.

Шупту 3 хүннүң дургузунда хондур-дүндүр офлайн болгаш онлайн-хайгаарал видео-бижидилгени шупту соңгулда участоктарының бадылаашкын эртер  187 оран-савазынга болгаш 19 девискээр соңгулда комиссияларынга чорудуп, республиканың соңгукчуларын 100 хуу хаара тудуп организастаан. 

Оон аңгыда 20 соңгулда участогунга соңгукчуларның бадылаан бюллетеньнериниң электроннуг санаашкынын чорудар комплекстерни  (КОИБ-2017) салган. 

Бадылаашкын чорудулгазын чырыдарынга 34 журналист 4  аккредитация (ук ажылга бүрүткел-чөпшээрел) эрткен МИЧ-ти төлээлеп, үш хүн дургузунда ажылдаан.

Февраль 17-ден март 7-ге чедир республикага “ИнформУИК” төлевилелди боттандырган.

40 градус ажыг күштүг сооктар үезинде 187 участок комиссиязының 668 кежигүнү бажыңнар эргип ажылдаан. 20 хонук дургузунда 74178 өрегени азы участокта кирип турар өрегелерниң  90,5 % эргип ажылдаан. Олар 205740 соңгукчунуң аразынга айтырыышкынны чоргузуп, оларның 82,0 %-биле харылзашкан.

Бадылаашкыннарның баш удур медээлери-биле:

Соңгулдага 189824 соңгукчу киришкен, ол дээрге республикада соңгукчуларның даңзызында соңгукчулар санының 95,59 %.   Оларның иштинде хуусаа бетинде – 9548 (5,03 %) кижи, соңгулда участогундан дашкаар – 28 040 соңгукчу (14,78%) бадылаан.

Протоколдарның 100 % санап көрген соонда, бадылаан үннер мынчаар хувааттынган:

         Владимир Путин – 95,37 % (180 902 үн);

Николай Харитонов (КПРФ) – 2,10 % (3 990 үн);

Леонид Слуцкий (ЛДПР) – 1,14 % (2167 үн);

Владислав Даванков («Новые люди») – 1,07 % (2039 үн).