«Өпей док» деп эмчи ажылдакчыларының уругларынга тускайлаттынган уруглар садының байырлыг ажылдыышкыны болуп эрткен

Бо хун Тыва дылывыстың хүнүнде «Өпей док» деп эмчи ажылдакчыларының уругларынга тускайлаттынган уруглар садының байырлыг ажылдыышкыны болуп эрткен.  Уруглар сады «Кадыкшылга палатазы» деп эмчилерниң хөй-ниити организацияның эгелээшкини-биле ажыттынган. Хөниитичи эмчилер  кадрлар чедишпес байдалды шиитпирлээринге үлүүн киирер сорулганы-биле ажылдап эгелээн болгаш бо хүн ажыдыышкын байырлалын эрттирер чедиишкинниг болган.

Идеяны амыдыралга боттантырарынга идигни Тыва Республиканның баштыңы Владислав Ховалыгның грантызы берген - эмчилер уруглар садын тургузарынга бажыңны арендага алгаш, эргежок чугула дериг-херекселди, эт-септи садып алган.

Палатаның удуртукчузу Анджела Канчыыр-оолдуң тайылбырлааны-биле алырга, уруглар-садынга ажылдаар башкы кадрлар айтырыы немелде бергедээшкинни тургускан. Айтырыгны Кызылдың башкы колледжиниң деткимчези-биле өөредилге үезинде алган билиглерин практика кырынга ажыглаар чадазында келген студентилерни хаара тутканы-биле шиитпирлеттинген.

Организастыг айтырыгларны шиитпирлээринге беримчелиг дузаны «Идегел» деп хөй-ниити организация каткан.

«Өпей док» уруглар садында 1,5-тен 6 харга чедир 50 уругларны хаара тудар арга тургустунган. Садтың бир онзагайы – тыва дылды уругларга өөредир угланыышкынныг кылдыр тургусканы болур.

Онзагай байырлалга кадык-камгалал сайыдынын оралакчызы Чейнеш Саая, эмчилерниң профэвилелиниң даргазы Денис Ондар, мурнуку чыыштын Эмчилер палатазының даргазы турган билдингир эндоваскулярлыг хирург эмчи Росси Кужугет, сайгарлыкчылар эвилелиниң төлээлери болгаш өске-даа сонуургалдыг кижилер белек-селектиг киришкен.

Уругларын «Өпей док» садынга тургузуп алыр күзелдиг эмнелге ажылдакчылары Эмчилер палатазынга бактаап кирип алгаш, билдириишкинни киирип болур.